INEC ta ayyana Adeleke a matsayin wanda ya lashe zaɓen Osun

Osogbo: Hukumar Zaɓe Mai Zaman Kanta ta Ƙasa (INEC) ta ayyana Gwamnan Jihar Osun, Ademola Adeleke, a matsayin wanda ya lashe zaɓen gwamnan jihar da aka gudanar ranar Asabar, 15 ga Agusta, 2026.

Adeleke, wanda ya tsaya takara a ƙarƙashin jam’iyyar Accord, ya samu ƙuri’u 511,067, inda ya doke ɗan takarar jam’iyyar APC, Bola Oyebamiji, wanda ya samu ƙuri’u 444,815.

Sakamakon ya ba Adeleke tazarar ƙuri’u 66,252, bayan da aka kammala tattara sakamakon daga dukkan ƙananan hukumomi 30 na jihar.

Ɗan takarar ADC, Najeem Salaam, ya zo na uku da ƙuri’u 17,180.

A matakin ƙananan hukumomi, Adeleke ya samu nasara a 19 daga cikin 30, yayin da Oyebamiji na APC ya lashe sauran ƙananan hukumomi 11.

Sanarwar sakamakon zaɓen na nufin Adeleke zai samu wa’adin mulki na biyu a matsayin gwamnan Jihar Osun, bayan INEC ta tabbatar da nasararsa a hukumance.

A yayin da ake jiran ƙarin martani daga ɓangarorin siyasa, mazauna Osogbo sun fito kan tituna domin nuna farin ciki bayan sanar da Adeleke a matsayin wanda ya lashe zaɓen.

Sakamakon ƙarshe:

• Accord – Ademola Adeleke: 511,067
• APC – Bola Oyebamiji: 444,815
• ADC – Najeem Salaam: 17,180