Gwamna Inuwa Yahaya Ya Amince da Naɗin Dr. Abdulrahman Adamu a Matsayin Mukaddashin Provost na Kwalejin Ilimi ta Billiri

Gwamnan Jihar Gombe, Muhammadu Inuwa Yahaya, CON, ya amince da naɗin Dr. Abdulrahman Mohammed Adamu a matsayin Mukaddashin Provost na Kwalejin Ilimi (College of Education), Billiri.

Sakataren Gwamnatin Jihar Gombe, Farfesa Ibrahim Abubakar Njodi, ne ya sanar da hakan, inda ya bayyana cewa an yi naɗin ne bayan tsohuwar Provost ɗin kwalejin, Dr. Bertha Danja, ta bar mukaminta sakamakon naɗa ta a matsayin Kwamishiniyar Harkokin Mata da Ci Gaban Al'umma ta Jihar Gombe.

Kafin wannan sabon naɗi, Dr. Abdulrahman Mohammed Adamu ya kasance Mataimakin Provost na Kwalejin Ilimi ta Billiri, inda ya taka rawa wajen tafiyar da harkokin gudanarwar makarantar da bunƙasa ayyukan ilimi.

A cikin sanarwar, Gwamna Inuwa Yahaya ya bayyana cewa yana da cikakken yaƙinin cewa sabon Mukaddashin Provost ɗin zai yi amfani da ƙwarewarsa, gogewarsa da nagartaccen shugabanci wajen ci gaba da ɗora kwalejin kan turbar ci gaba.

Gwamnan ya kuma bayyana cewa ana sa ran sabon shugaban zai ƙarfafa nasarorin da kwalejin ta samu a baya, tare da inganta manufarta ta samar da ƙwararrun malamai masu inganci domin bunƙasa harkar ilimi a Jihar Gombe da Najeriya baki ɗaya.

Sanarwar ta ƙara da cewa naɗin Dr. Abdulrahman Mohammed Adamu ya fara aiki ne daga ranar 24 ga Yuli, 2026.

Masu ruwa da tsaki a fannin ilimi na sa ran sabon shugabancin zai ci gaba da inganta tsarin gudanarwa, haɓaka ingancin koyarwa da kuma ƙarfafa martabar Kwalejin Ilimi ta Billiri a matsayin ɗaya daga cikin manyan cibiyoyin horas da malamai a Najeriya.