Babban Jami'in Kudin ISWAP Ya Miƙa Wuya ga Dakarun Operation HADIN KAI a Borno

Wani babban jami'in ƙungiyar ISWAP mai kula da harkokin kuɗi ya miƙa wuya ga dakarun Operation HADIN KAI (OPHK) a Jihar Borno.

A cikin wata sanarwa da Mukaddashin Jami'in Yaɗa Labaran Soji na Operation HADIN KAI, Kyaftin Mohammed Goni, ya fitar ga manema labarai a Maiduguri ranar Lahadi, ya ce dakarun sun sake samun wani gagarumin nasara bayan miƙa wuya da wannan babban jami'in ISWAP ya yi. Ya ce hakan na nuna irin tasirin hare-haren soji da kuma ayyukan tattara bayanan sirri da ake ci gaba da gudanarwa a yankin Arewa maso Gabas.

Goni ya bayyana cewa wannan na zuwa ne yayin da ake ci gaba da samun ƙaruwar 'yan ta'adda da ke miƙa wuya, inda kusan 'yan ta'adda 46 tare da iyalansu suka miƙa wuya ga dakarun soji cikin 'yan kwanakin nan, abin da ke nuna irin matsin lambar da ake yi wa sansanonin 'yan ta'addan.

Ya ce wanda ake zargin ya miƙa wuya ga dakarun Bataliya ta 3 ƙarƙashin 24 Task Force Brigade da misalin ƙarfe 6:45 na safiyar ranar 25 ga Yuli, 2026, a kan hanyar Ladari–Jegarawa–Tunokalia da ke kan babbar hanyar Gamboru–Wulgo.

Kakakin Operation HADIN KAI ya ƙara da cewa matakin da ɗan ta'addan ya ɗauka na ajiye makamansa ya biyo bayan jerin hare-haren ƙasa da na sama da rundunar ta kai kwanan nan kan sansanonin 'yan ta'adda.

Binciken farko ya nuna cewa mutumin shi ne babban jami'in kula da harkokin kuɗi na sansanin ISWAP da ke Jubillaram, inda aikinsa ya haɗa da kula da kuɗaɗen ƙungiyar da kuma shirya harkokin samar da kayan aiki. Ya miƙa wuya tare da 'ya'yansa maza biyu.

Kayan da aka ƙwato daga hannunsa sun haɗa da:

• Bindiga kirar AK-47 guda ɗaya.
• Mujallu huɗu na bindigar.
• Alburusai 101 na nau'in 7.62mm Special.
• Babur guda ɗaya.
• Kuɗi har Naira 40,000.

Kyaftin Goni ya ce a halin yanzu ana ci gaba da yi wa mutumin tambayoyi da tantance bayanansa domin samun muhimman bayanan sirri da za su taimaka wajen ci gaba da yaƙi da sauran 'yan ta'adda da ke yankin.

Ya bayyana cewa miƙa wuya da wannan babban jami'in kuɗi ya yi wani babban koma baya ne ga ISWAP, domin yana nuna cewa tsarin jagoranci, ƙarfin aiki da hanyoyin samun kuɗaɗen ƙungiyar na ci gaba da raunana sakamakon matsin lambar da Operation HADIN KAI ke yi.

Ya kuma ce yawaitar waɗanda ke miƙa wuya a baya-bayan nan na nuna cewa ƙwarin gwiwar 'yan ta'addan na raguwa, yayin da ake ci gaba da samun masu ficewa daga sansanoninsu.

A ƙarshe, rundunar Operation HADIN KAI ta sake jaddada aniyarta ta tabbatar da zaman lafiya da tsaro mai ɗorewa a yankin Arewa maso Gabas, tare da yin kira ga sauran 'yan ta'adda da su yi amfani da shirye-shiryen gwamnatin tarayya na sulhu da ajiye makamansu kafin lokaci ya kure musu.

Rundunar ta kuma buƙaci al'umma da su ci gaba da bai wa hukumomin tsaro sahihan bayanai cikin lokaci domin ƙara inganta yaƙin da ake yi da ta'addanci.