Mutane 18 Sun Rasa Rayukansu a Hatsarin Mota a Jihar Kebbi

An sake samun wani mummunan hatsarin mota da ya yi sanadiyyar asarar rayuka a Najeriya, bayan da aka tabbatar da mutuwar mutane akalla 18 ‘yan asalin jihar Sokoto a hanyar Sokoto–Yauri da ke jihar Kebbi.

Rahotanni sun nuna cewa mamatan na dawowa gida ne daga jihar Lagos, inda suka je neman hanyoyin samun abin dogaro da kai da kuma gudanar da wasu harkokin rayuwa.

Majiyoyi sun ce hatsarin ya faru ne a wani sashe na hanyar, lamarin da ya janyo mutuwar mutane da dama nan take, yayin da wasu suka samu raunuka daban-daban.

Lamarin ya jefa iyalai da al’ummomin da abin ya shafa cikin alhini da jimami, musamman ganin cewa mutanen sun yi tafiya ne domin neman inganta rayuwarsu.

Masu sharhi kan harkokin sufuri na ci gaba da kira ga direbobi da masu amfani da hanyoyi da su yi taka-tsantsan tare da bin dokokin hanya domin rage yawan hatsurran da ke haddasa asarar rayuka a ƙasar.

Har zuwa lokacin haɗa wannan rahoto, hukumomi na ci gaba da tattara ƙarin bayanai kan yadda hatsarin ya faru da kuma ainihin musabbabinsa.