Dakarun Soji Sun Lalata Maboyar ISWAP, Sun Kwato Makami a Wani Samame a Borno

Dakarun Operation HADIN KAI sun lalata wata maboyar da ake zargin ta mayakan Boko Haram/ISWAP ce, tare da kwato makamai a wani samamen share dajin da suka gudanar a karamar hukumar Gubio ta jihar Borno.

Majiyoyi sun shaida wa Zagazola Makama cewa an gudanar da wannan samame da misalin karfe 9:30 na safiyar ranar Asabar, bayan samun sahihan bayanan sirri kan motsin 'yan ta'adda a yankin Layi.

A cewar majiyoyin, dakarun Bataliya ta 145 (Mechanised), karkashin jagorancin Kwamandan Bataliyar, sun nufi wurin da aka ba da rahoton, inda 'yan ta'addan suka tsere cikin rudani da zarar suka hango dakarun sojin suna karatowa.

Bayan haka, dakarun sun mamaye tare da lalata maboyar 'yan ta'addan, sannan suka gudanar da bincike a yankin, inda suka kwato bindiga kirar Pump-Action guda daya da kuma mujallun harsasai uku na AK-47, wadanda 'yan ta'addan suka bari yayin da suke tserewa.

A matsayin wani bangare na wannan samame, dakarun sun kuma bazama zuwa kauyen Mallamti Ganyawa, amma ba su yi arangama da 'yan ta'addan ba.

An kammala aikin cikin nasara ba tare da an samu asarar rai ko jikkata wani daga cikin dakarun ba, sannan suka koma sansaninsu lafiya da misalin karfe 2:45 na rana.

Majiyoyin soji sun bayyana cewa duk da cewa yanayin tsaro a yankin na da sauki a halin yanzu, har yanzu akwai bukatar yin taka-tsantsan. Sun kara da cewa dakarun na ci gaba da kasancewa cikin shirin ko-ta-kwana tare da ci gaba da kai farmaki kan maboyar 'yan ta'adda a yankin Arewa maso Gabas.